“ဂန္ထဝင်နန်းတော်များ”

စပိန်နိုင်ငံ၊ တောင်ပိုင်း Granada မြို့ရဲ့ အရှေ့ဘက်ခြမ်းက La Sibina တောင်ထိပ်ပေါ်မှာတည်ရှိတဲ့ Alhambra နန်းတော်ကြီးကိုတော့ မိမိကိုယ်ကို စော်ဘွားအဖြစ် ကြေညာခဲ့တဲ့ Muhammad ibn Nasr က (၁၂၃၈) ခုနှစ်မှာ စတင်တည်ဆောက်ခဲ့တာဖြစ်ပါတယ်။ ဒီနန်းတော်ကြီးမှာဆိုရင် အစ္စလာမ်ဗိသုကာလက်ရာတွေနဲ့ (၁၆) ရာစုနှောင်းပိုင်းကာလတုန်းက ခရစ်ယာန်ဗိသုကာလက်ရာတွေ ပေါင်းစပ်ထားတာကို တွေ့မြင်ရနိုင်ပြီး Alhambra ဆိုတာကတော့ အာရဗီဘာသာစကားနဲ့ အနီရောင်လို့ အဓိပ္ပာယ်ရပါတယ်။ Nasrid မင်းဆက်တို့ရဲ့ စီးပွားရေးကြွယ်ဝမှုတွေကိုတွေ့မြင်နိုင်တဲ့ ဒီနန်းတော်ကြီးမှာ ဘယ်လိုစိတ်ဝင်စားစရာကောင်းတဲ့ နောက်ထပ်သမိုင်းကြောင်းတွေရှိတယ်ဆိုတာကိုတော့ ဆက်လက်နားဆင်နိုင်ပါတယ်။

ဂျပန်နိုင်ငံ၊ တိုကျိုမြို့ရဲ့ အလည်ခေါင်မှာရှိနေတဲ့ တိုကျိုအင်ပါယာနန်းတော်ကြီးဟာဆိုရင် ဒုတိယကမ္ဘာစစ်ကာလတုန်းက မဟာမိတ်တပ်တွေရဲ့ အပြင်းအထန် ဗုံးကြဲဖျက်ဆီးခြင်းတွေကိုခံခဲ့ရပေမဲ့လည်း တော်ဝင်မိသားစုတွေကတော့ လက်ရှိအချိန်အထိတိုင် ဒီနန်းတော်ကြီးမှာ နေထိုင်နေကြဆဲဖြစ်ပါတယ်။ ဒုတိယကမ္ဘာစစ်ကို အဆုံးသတ်စေတဲ့ ဂျပန်တို့လက်နက်ချခြင်းကို ဂျပန်ဘုရင် ဟီရိုဟီတိုက တိုကျိုအင်ပါယာနန်းတော်ကြီးရဲ့ လေကြောင်းကာကွယ်ရေး မြေအောက်ခန်းအတွင်းကနေ ဆုံးဖြတ်ချက်ချခဲ့တာကြောင့် ဒီနန်းတော်ကြီးဟာ စိတ်ဝင်စားစရာကောင်းတဲ့ သမိုင်းအကြောင်းအရာတွေနဲ့ပြည့်နှက်နေတဲ့ နေရာတစ်ခုဆိုရင်လည်းမမှားပါဘူး။ ဒါကြောင့် စိတ်ဝင်စားစရာကောင်းလှတဲ့ တိုကျိုအင်ပါယာနန်းတော်ကြီးအကြောင်းကို စုစည်းတင်ဆက်ပေးလိုက်ပါတယ်။