“သိုင်းလောကရဲ့စိန်ခေါ်သံ”

ဟွာဆန်းဂိုဏ်းမှ ရုပ်ဆိုးမလေးက လင်းဖိန်ကျစ်တို့မိသားစုကိုဖမ်းဆီးထားတဲ့ ချင်းချန်ဂိုဏ်းမှ ဖန်းလန်ကျစ်၊ ယွီလန်ဟောင်တို့နဲ့ ဘယ်လိုမျိုးအပေးအယူတွေလုပ်မလဲ။ အဲဒီအပေးအယူကရော ရွှေဘုံစံသူဌေးသားလေး လင်းဖိန်ကျစ်ရဲ့ဘ၀ကို ဘယ်လိုပုံစံနဲ့တစ်ဆစ်ချိုးပြောင်းလဲပစ်လိုက်မလဲ။ ဒါ့အပြင် ရုပ်ဆိုးမလေးကြောင့် ချင်းချန်ဂိုဏ်းမှတစ်ကိုယ်တည်းလွတ်မြောက်ခွင့်ရသွားပြီးနောက်မှာ လင်းဖိန်ကျစ်တစ်ယောက် ကျန်ရှိတဲ့မိဘနှစ်ပါးကိုကယ်တင်ဖို့အတွက် ဘယ်လိုကြိုးစားမလဲ။ ဒီလိုစိတ်ဝင်စားစရာကောင်းတဲ့ ဇာတ်ကွက်တွေကိုတော့ အခုတင်ဆက်ပေးထားတဲ့ အပိုင်း (၅) မှာ နားဆင်ခံစားနိုင်မှာပါ။

သားတစ်ယောက်လုံးရဲ့ အသက်ကိုရင်းပြီး ချင်းချန်ဂိုဏ်းချုပ်ကိုယ်တိုင် ဖူဝေးအာမခံဌာနမှာ လာရောက်ရှာဖွေတဲ့အရာက ဘာများလဲ။ ဖူဝေးအာမခံဌာနကြီးရဲ့ ဖိရှယ်ဓားသိုင်းကျမ်းကရော သတင်းစကားတွေအတိုင်း တကယ် အစွမ်းထွက်ရဲ့လား။ သီလရှင်ကြီးတိန့်ရိကရော လောင်သယ်နော့တို့ စကားစမြည်ပြောပြီး စားသောက်နေချိန်မှာ ဘာအကြောင်းကြောင့် ရုတ်တရက်ရှိလာခဲ့တာလဲ။ ဒီမေးခွန်းတွေရဲ့ အဖြေတွေကိုတော့ အခုတင်ဆက်ပေးထားတဲ့ အပိုင်း (၈) မှာ နားဆင်နိုင်ပါတယ်။

ယွီချန်းဟိုင်ကို သွေးကြွေးဆပ်ချင်နေတဲ့ လင်းဖိန်ကျစ်တစ်ယောက်၊ အကုန်လုံးက သူ့ကို မြောက်ပိုင်းကုလားအုတ်လို့ နာမည်ကျော်ကြားတဲ့ သိုင်းပညာရှင် မုကောင်းဖုန်းနဲ့ ဆွေမျိုးတော်စပ်သူလို့ ထင်မှတ်မှားသွားကြတဲ့အခါ၊ ဘယ်လိုချော်လဲရောထိုင်တွေလုပ်ပြီး ဘာတွေဆက်ဖြစ်ကြမလဲဆိုတဲ့ ဇာတ်လမ်းဇာတ်ကွက်တွေကိုတော့ အပိုင်း(၁၃)မှာ နားဆင်နိုင်ပါပြီ။

မယ်သီလရှင်လေး ရီလင်တစ်ယောက် လင့်ဟူချုံးရဲ့ အလောင်းကို မျက်မြင်တွေ့နိုင်ရန် ဖေးဖေးကို ကတိပေးထားသည့်အတိုင်း လူတစ်ယောက်ကို ကယ်တင်ပေးရာမှ ထိုလူက အသက်ရှိနေဆဲ လင့်ဟူချုံးဖြစ်ကြောင်း သိလိုက်ရပြီး သူမဟာလည်း နောက်တစ်ကြိမ် အရှုပ်အထွေးများကြားသို့ ထပ်မံရောက်ရှိသွားပါတော့တယ်။ လင့်ဟူချုံးနဲ့ ဖေးဖေး၊ ရီလင်တို့ သုံးယောက်ပေါင်းပြီး ယွီချန်းဟိုင်ကို ဘယ်လိုအရူးလုပ်ကြမလဲ စတဲ့ ဇာတ်ကွက်တွေကိုတော့ အပိုင်း(၁၅)မှာ နားဆင်ကြည့်လိုက်ရအောင်ပါ။

ရွှေဓားရှင် ဝမ်ရွှယ်ပါ့တို့ မိသားစုမှာ လင့်ဟူချုံးထံတွင် ရှိနေသော သိုင်းလောကရဲ့ စိန်ခေါ်သံ တေးဂီတစာအုပ်ကို ဖိရှယ်ဓားသိုင်းကျမ်းဟု ထင်မှတ်
မှားကာ လင့်ဟူချုံးကို သူခိုးသူဝှက်သဖွယ် မချေမငံဆက်ဆံကြပုံ၊ ဂီတပညာမှာ တစ်ဖက်ကမ်းခတ်တတ်မြောက်သည့် ဘွားဘွားတစ်ယောက်က ယင်းစာအုပ်ကို တေးဂီတစာအုပ်မှန်းထောက်ခံပေးခဲ့ပုံ၊ ဘွားဘွားမှ လင့်ဟူချုံး၏ ဝေဒနာ အလုံးစုံကို သိရှိသွားကာ ကိုယ်စိတ်နှလုံး အေးရိပ်ဖုံးတေးဖြင့် သက်သာလိုသက်သာငြား ကုသပေးခဲ့သော်လည်း အရှင်းမပျောက်ပုံ၊ လင့်ဟူချုံးမှာ ဘွားဘွားထံမှ ထိုတေးသွားကို တီးခတ်တတ်အောင် သင်ယူချင်ခဲ့ပုံစတဲ့ ဇာတ်ကွက်များကိုတော့ သိုင်းလောကရဲ့ စိန်ခေါ်သံ အပိုင်း(၄၁)မှာ နားဆင်နိုင်ပါတယ်။

လင့်ဟူချုံးမှာ ဘွားဘွားနှင့် အဘလွီကျူတို့ထံမှ စောင်းပညာရပ်ကိုသင်ယူနေခဲ့သော်လည်း သင်ယူလက်စတေးတစ်ပုဒ် မပြီးဆုံးခင်မှာပင် ယင်းမြို့မှ ထွက်ခွာဖို့ အကြောင်းဖန်လာခဲ့ပုံ၊ အဘလွီကျူမှာ သာမန်တေးဂီတပညာရှင်တစ်ဦးသာ မဟုတ်ဘဲ အဆင့်မြင့်သိုင်းပညာရှင်တစ်ဦးဖြစ်နိုင်ပုံ၊ လင့်ဟူချုံးနှင့် ဟွာဆန်းဂိုဏ်းမှာ ခိုင်းဖုန်းမြို့သို့ရောက်လာခဲ့ကြပုံ၊ ယွဲ့ဂိုဏ်းချုပ်နှင့် ယွဲ့ကတော်တို့မှာ ခိုင်းဖုန်းမြို့တွင် မထင်မှတ်ပဲ မက်မွန်ညီနောင်ထဲမှ ငါးယောက်ကို မြင်လိုက်ရသဖြင့် ထိတ်လန့်ပြီး နောက်ယောင်ခံလိုက်ကြရာ ခိုင်းဖုန်းမြို့ရှိ အထင်ကရ ပုဂ္ဂိုလ်တစ်ဦးဖြစ်သည့် လူသတ်သမားတော်ကို မြင်တွေ့ခဲ့ရပုံ စသည့် ဇာတ်ကွက်များကို သိုင်းလောကရဲ့ စိန်ခေါ်သံ အပိုင်း(၄၂)မှာ စိတ်လှုပ်ရှားဖွယ် နားဆင်နိုင်ပါတယ်။

ယွဲ့လင်စန်းနှင့် လင်းဖိန်ကျစ်တို့မှာ ဖိရှယ်ဓားသိုင်းစာအုပ်ကို လင့်ဟူချုံးက ခိုးယူထားသည်ဟု သံသယဝင်နေကြောင်း ပြောဆိုနေကြရာတွင် လင့်ဟူချုံးကို လေးစားသည့် လူ့ဘီလူးကြီးတစ်ယောက်မှ မကျေမနပ်ဖြစ်ကာ ဖမ်းခေါ်သွားပုံ၊ ကျူချန်းချိုးတစ်ယောက် ဆေးခိုးလာခဲ့သည့် လူဝကြီး လောင်ထိုကျီမှာလည်း သူ့သမီးအတွက် ဖော်စပ်ထားသည့်ဆေးမှာ အကုန် လင့်ဟူချုံး၏ အရက်ခွက်ထဲအကုန်ပါသွားပြီဖြစ်ရာ လင့်ဟူချုံး၏သွေးကို သူ့သမီးအားဖောက်တိုက်ရန် ဖမ်းခေါ်လာခဲ့ပုံ၊ ထိုအချိန်တွင် ကျူချန်းချိုးရောက်ရှိလာပြီး လင့်ဟူချုံးမှာ မည်သူမည်ဝါနှင့် ခင်မင်ရင်းနှီးကြောင်း ပြောပြလိုက်ရာ လင့်ဟူချုံးပင် ထိုသူမည်သူမှန်း မသိသော်လည်း လောင်ထိုကျီမှာ လင့်ဟူချုံး အသက်အား မထိပါးရဲတော့ပုံ၊ သို့သော်လည်း ထိုပုဂ္ဂိုလ်မှာ မည်သူဖြစ်ကြောင်းကို ကျူချန်းချိုးနှင့် လောင်ထိုကျီတို့ နှုတ်မှ လုံးဝမဟကြပုံ စတဲ့ ဇာတ်ကွက်တွေကိုတော့ အပိုင်း (၄၅)မှာ ရင်တထိပ်ထိပ်နဲ့ နားဆင်ခံစားနိုင်မှာ ဖြစ်ပါတယ်။

လင့်ဟူချုံးမှာ ကျူချန်းချိုးနှင့် လောင်ထိုကျီတို့ကို ချုပ်နှောင်ထားခဲ့ပြီး လောင်ထိုကျီ၏ သမီးဖြစ်သူကို ကယ်တင်ရန် သူ၏ လက်ကောက်ဝတ်သွေးကြောကို ဖောက်ကာ ထိုကောင်မလေးအား အတင်းသောက်စေပြီး သွေးနှစ်ခွက်တိုက်အပြီးမှာတော့ သူကိုယ်တိုင်မခံနိုင်တော့ဘဲ မေ့မြောသွားပုံ၊ လောင်ထိုကျီတို့မှာ ကုသပေးဖို့ရာလည်း မစွမ်းသာသဖြင့် အကောင်းဆုံးသွေးအားတိုးဆေးများကို တိုက်စေကာ ဟွာဆန်းဂိုဏ်းသားများရှိရာသို့ ပြန်ပို့ပေးလိုက်ပုံ၊ လင်းဖိန်ကျစ်နှင့် ယွဲ့လင်စန်းတို့မှာလည်း ပြန်လည်လွတ်မြောက်လာပုံနှင့် လင့်ဟူချုံးကို ဒေဝီဂိုဏ်းချုပ် လန်ဖုန့်ဟွမ်ကိုယ်တိုင် လာရောက်ကုသပေးပုံများကိုတော့ အပိုင်း (၄၆)မှာ စိတ်ဝင်စားဖွယ်နားဆင်ခံစားရမှာပဲ ဖြစ်ပါတယ်။

အပိုင်း (၆၁) မှာဆိုရင်တော့ လင့်ဟူချုံးက ဟိန်ဆန်းဂိုဏ်းသားများကို ကယ်တင်နိုင်ဖို့ ကြိုးစားခဲ့ပုံ၊ မယ်သီလရှင်ကြီး တိန့်ကျင့်မှ လင့်ဟူချုံးကို အလွန်အမင်း လေးစားပုံ၊ တိန့်ကျင့်၏ နောက်ဆုံးထွက်သက်တွင် လင့်ဟူချုံး၏ သရုပ်မှန်ကို သိရှိလိုပုံ၊ လင့်ဟူချုံးမှလည်း ထိန်ချန်မနေတော့ဘဲ မည်သူမည်ဝါဖြစ်ကြောင်းကို အကုန်အစင်ပြောပြခဲ့ပုံ စတဲ့ ဇာတ်ကွက်များကို စိတ်ဝင်စားဖွယ်၊ စိတ်လှုပ်ရှားဖွယ်၊ ဝမ်းနည်းဖွယ် စတဲ့ ရသစုံလင်စွာဖြင့် နားဆင်ခံစားနိုင်မှာဖြစ်ပါတယ်။

လင့်ဟူချုံးရဲ့ ဟိန်ဆန်းဂိုဏ်းချုပ်ရာထူးဆက်ခံပွဲကို ဝူတန်းဂိုဏ်းချုပ်ကြီး ရသေ့ ချုံးရွှီးမှလည်း နောက်လိုက်ရှစ်ယောက်နဲ့ အတူ တက်ရောက်ခဲ့ပုံ၊ လင့်ဟူချုံး ဟိန်ဆန်းဂိုဏ်းချုပ်တစ်ယောက် လုပ်ရမည့် တာဝန်ဝတ္တရားတို့ကို ကတိသစ္စာ ခံယူနေစဉ် ဂိုဏ်းကြီးငါးဂိုဏ်း မဟာမိတ်အဖွဲ့ခေါင်းဆောင် ကျော်ချန်လန်၏ အမိန့်ဟုဆိုကာ လင့်ဟူချုံး ဂိုဏ်းချုပ်ဆက်ခံခြင်းကို တားမြစ်ရန် ရောက်လာကြပုံစသည့် ဇာတ်လမ်းဇာတ်ကွက်များကိုတော့ အပိုင်း (၇၂)မှာ စိတ်လှုပ်ရှားဖွယ် နားဆင်နိုင်မှာ ဖြစ်ပါတယ်။